Pebrero 22, 2019

Ang tagal kong nawala. Okay naman buhay ko ngayon. Homeostasis. Ganap na kaayusan. Lahat nasa tamang lugar. Sapat ang pagod ng katawan para tawagin ng antok. Ihehele ng kuliglig at gigisingin ng mga huni. Pero hindi ako nahihilig magsulat. Kaunting basa lang. 

Parang nahuhulog ulit ako sa ibang bagay; sa ibang mundo. Naririnig ko na namang natatawa si Tsang Lorie dahil parang iba na naman ang gusto kong gawin. Kung titingnan, mapalad nga ako dahil hindi lahat kayang gawin 'yung gusto nilang gawin araw-araw. Hindi ko ipagpapalit (sa ngayon) 'yung pagdidilig uma-umaga sa mga tanim kong hardin at gulay sa trabaho sa isang korporasyon. 

[Pero malay mo bigla na lang akong kuritin ng buhay at magising na nagkukurbata at nagsisintas ng leather shoes at nakikipagsapalaran muli sa Maynila. Ilalayo nama't 'wag ilalapit!]

Kaya siguro hindi na ako masyadong nagsusulat. Maayos kasi lahat. Kapag magulo kasi ang kalendaryo ko, feeling ko naaayos ang buhay ko kapag nagsusulat. Walang masakit. Walang pumupuyat. Pumikit saglit at napangiti. Nanunuot kasi sa'kin ngayon na dapat magpasalamat. Na halos hindi mo maisip kung anong masalimuot na puwedeng kasunod. 

#

Dyord

Sitio Lipute, Brgy Kinalaglagan

Mataasnakahoy, Batangas

Pebrero 22, 2019

Di Napadalang Sulat (sa mga Efs)

Efs Ren at Efs Charm:

Hoy! Kumusta na kayo?

Ako, medyo oks na. Nabunutan na ng isang tinik dahil nakalabas na si Roy sa ospital. Nabibisibisita ko si Jeuel dito sa PGH. Isang sakay lang naman. Doon ako nagla-lunch para naman hindi s’ya mainip. Si Alquin, malayo, text-text lang kami.

Tungkol sa tzitzit at tekhelet. Tzitzit ay parang tali na may disenyo at kulay bughaw-langit (tekhelet or sky-blue). Ayon sa mga scholars, ang kulay na tekhelet ay mula sa isang species ng suso (Murex trunculus) sa Mediterranean Sea. Tinatali ng mga Hudyo ang tzitzit sa kanilang damit o mga balabal para ipaalala sa kanila ang relasyon nila sa Diyos (Numbers 15:38-39).

Tungkol sa mga relasyon. Ang dami ngayong couples na may magkaparehas na damit. Maraming love songs sa radyo. Maraming naghahanap. Maraming nagpupumait. Maraming chocolates at flowers pero hindi tayo magpapadala sa daloy ng tradisyon! Istey pokus!

Tungkol sa date. Tandaan na ako ang una n’yong ide-date kapag sumusuweldo na kayo. Hindi naiinggit sa mga couples sa Intramuros wall ang kuya n’yo.

#

Dyord

Pebrero 04, 2015

Intramuros, Manila