Lunes, Ambiles!

Lunes, Ambiles!

Nagising ako. Kena E-boy ulit. Nilamay namin ang 5-page position paper ni Gyl, pinsan ni Ebs na public ad student. Letranista daw ang bago nilang propesor at nakakasindak. Nagpatulong si Gyl. Dalawang gabi naming ginawa ang position paper niya sa #SONA 2015 at awa naman ng Diyos ay natapos. Umabot pa ng 8 pages kasama ang bibliography. Puyat na p(u/a)yat kami ni Ebs, kaya tanghali pa ang gising.

Pag-gising ko ay paalis naman sina Babes kasama sina Pastor at Mrs. P, ihahatid na ulit si Babes sa university sa Lucban, kasabay na rin si Gyl. Isinasama nga kami ni Pastor, kaya lang ay parang nilason si E-boy dahil walang kamalay-malay ito. Sinilip ko ang butas ng ilong nito at nakita ko ang utak nya, "sorry, we're closed" ang sabi ng karatula. Kaya iwan kami.

Bumangon na ako. Inalok ako ni Lola Nits ng sinangag, pandesal, peanut butter, chiz whiz, palabok, at sopa; e di ko pa feel kumain ng walang ginagawa kaya nag-kape at pandesal na lang ako. Mamaya na lang ang real meal kasabay ni Ebs. Pagkatapos ko sa mesa ay nagwalis ako sa kusina-sala nila. Nag-mop. Naglinis ng banyo. Inilabas ang basura dahil dumaan ang trak. Hindi pa rin ako pinapawisan.

Nagbasa ako ng kaunti. Nakaramdam na 'ko ng pawis kung kelan nagpahinga na 'ko. Maya-maya pa'y gising na si E-boy. Nag-almusal. Nagbukas ng tv. Humawak ng selpon. Jumebs. Nagchannel surfing. Ipinapako ko sa Star Movies. Nakita ko kasi si Cameron Diaz.

The Other Woman ang pamagat. Hindi ko ma-gets, hindi namin naumpisahan e. Nakakatawa lang talaga si Cameron Diaz. Hindi ko alam kung dito ba galing yung No Other Woman ni Anne Curtis. Nang magtagal nakuha rin namin ang kuwento. May isang misis na may mister na siyempre, may kabit. Si Cameron D. ang Kabet no. 1. At siyempre may Kabet no. 2; higit na mas bata sa totoong asawa at kay Cam. D. Magtutulungan ang tatlo para maibagsak at matuldukan ang kasamaan ni Mike, ang salbaheng asawa. Nariyang nilagyan ng pampatae ang inumin, hinahaluan araw-araw ng estrogen ang shake ni Mike, pinalitan ang shampoo ng hair removal, at kung anu-ano pang kasalbahihan noong tatlong magkakaribal sana pero naging magbabarkada. Laugh trip talaga ito.

  Kakaiba ang approach noong asawa ni Mike sa kanyang mga karibal. Dahil kung sa Pilipinas na pelikula 'yon, palaging salpukan ng lines at sampalang umaatikabo. Sa ending, mahihiwalay sila ng tuluyan kay Mike dahil friendship lang ang forever. Magiging bff pa ang dating magkaka-agaw. Hagalpak pa sa twist sa ending!

 "Next: Maze Runner" nakalagay sa bandang kaliwa ng tv. Alam kong matagal na 'tong gustong panoorin ni Ebs kaya naman niyaya ko siyang mag-rebyu. Ayaw niya raw. Kinonsensya ko pa siya na hindi pa siya nagdedevotion o nagpray man lang pagkagising; magdevotion muna siya. Wala raw makakapigil sa panonood niya. Nang-aasar lang talaga ako kaya nilubos ko na. Yung mataba d'yan at yung mukhang laging barino na artista, mamatay yan sa ending!

   Maya-maya ay dumating na sina Pastor. Tinulungang magbaba ng pinamili sa Lucban. Tapos, nagmerienda ng tinapay, buding, pipino, at mansanas.

  Pagkatapos ng Maze Runner ay pumasok si Ebs sa kwarto. Matutulog na naman. Ako'y bigla namang tinawagan ni Ate Tin, kailangan ko raw magpanotaryo ng deed of udertaking. Kailangan ito para sa release ng iskolarsyip. Kailangan ko raw pumunta ng univeristy para sa form. Pupunta rin naman si Ebs sa iskul at aasikasuhin ang graduation pic niya. Pinagising ko na at sabi ko'y uuwi muna ako para magbihis at sasama na ko paiskul. Tapos, naisip niyang bumisita kena Ate Anj, kaibigan naming missionary sa Candelaria. Tamang tama naman dahil sa Candelaria ako magpapanotaryo. Hindi na ko nagtanghalian dahil busog pa nga. Umuwi na ko agad-agad.

Dumaan ako ng palengke. Sa puwesto namin, masakit pa ang tiyan ni Mama kaya mamaya na lang ako hihingi ng pampanotaryo.Umuwi muna ako sa bahay ay nagmadaling maligo at nagbihis. Nagbukas ng TV para masilayan si Yaya Dub, kaya lang tapos na pala ang kalyeserye. Umalis na ko at dumaan ulit sa puwesto namin at nanghingi ng pera. Nag-abot naman si Mama ng pampanotaryo na 200 pesos. Zoom! Pabalik na ulit kena Ebs.

   Nakabihis naman na ito pagdating ko doon ng mga 2:30 pero 3: 15 na kami naka-alis dahil sa tagal nito sa salamin. Pagdating sa iskul, agad akong nagtungo sa bintana ng faculty at inabyad ang abyarin. Fill up tapos ibalik daw ke Ate Tin ang form. Tapos, picture naman ni Ebs, sa binatana naman ng registrar ang transaction nito. Lumagay lang ako sa gilid habang nakikipag-usap si Ebs kay Mam Noreen.

"Mam grad pic po?"
"Resibo?"
"Pano po pag nawala ang resibo?"
"Clearance?"
"Pano po pag naiwan ang clearance?"
"Balik na lang."

   Parang nasagasaan ulit ang mukha ni E-boy. Tapos, tinawanan ko pa. Ang issue dito ay hindi ang hindi pagkakuha ng grad pic, kundi hindi gumana ang "charm" niya kay Mam Noreen. At pangalawang beses na 'to.

   Express kaming bumisita sa Kubo at kinausap si Ate Abyy, tungkol sa talk ko sa Huwebes. Tapos nag-fill up na ko. Si Ebs gusto nang umuwi, nawalan na nang gana. Sabi ko pa na ang totoong charm ay napapakinabangan kapag kailangan. Sa bata lang daw gumagana ang charm niya.

   Pag-alis ng iskul, habang kinakausap ko pa si Ate Tin tungkol sa kung kaninong iskolarsyip ang irerelease ay bigla namang sumingit si Karla, kasamahan ko ito sa pub dati, tungkol naman sa naudlot kong aplikasyon aa university ang pinag-uusapan namin. Tapos, bigla namang sumingit si Nikabrik, nagtatanong kung bakit daw ako naroon. Tapos, si Utoy naman na bibili raw ng bantam. Tapos, si Ebs na ulit ang kausap ko, sabi ko magpa-kyut ka na lang sa mga pabebe girls sa dyip mamaya para makabawi.

  Express lahat ng kinausap ko. Hindi ako sanay. Walang puknatan akong makipagkwentuhan. Naghahabol ako kay oras. Kailangan pa kasing magpanotaryo. Bumisita kay Ate Anj. Umuwi ni Eboy ng maaga at magtutor. Oh oras, tila ambilis mo naman ngayon, paluwas ka ba ga? Pero hindi gagana ang kahit anong pagpapakyut para maghintay siya.

Dyord
Agosto 10, 2015