Bes for All Season

(c) Typist.PH

     Kay Barbs ng Die Beautiful directed by Jun Robles Lana at screenplay by Rody Vera.

     Ang Die Beautiful ay tungkol sa buhay Trans na nagpabalik-balik sa mga flashbacks ng buhay ni Trisha na ginampanan ni Paolo Ballesteros. Si Barbs na ginampanan naman ni Christian Bables ay ang bff ni Trisha. Ang husay ng character ni Barbs sa pelikula, sobrang supportive. Agaw pansin si Barbs pero hindi nagpapansin, maganda lang talaga ‘yung character n’ya.

     Paborito ko ‘yung scene sa bintana, nakalimutan ko na kung anong pinag-uusapan nila, tag-isa sila ng bintanang inupuan at napupuwangan lang ng kapirasong dingding. Ang ganda lang. 

    

   Criteria for judging:

10% High school friend s’ya ni Trish. Hayskul layf na walang kasing saya ay may mga hayskul bffs na wala ring kasing saya. Medyo may madilim nga lang na karanasan si Trisha noong hayskul.

10% Makulay. Masaya lang sila sa mga raket, aura, at simpleng pagtambay. Pero hindi laging masaya, may mga bahagi rin na masakit. Pahit may mga madidilim na bahagi sila Barbs at Trisha, laban pa rin. Literal na laban, kontesera kasi sila mga gay pageants. Tinatakpan na lang ng concealer ang mga literal at figurative na pasa ng buhay.

40% Bes Supporting Role. Si Barbs handang makipagsabunutan para sa’yo kahit saang lansangan. Handa kang patirahin sa bahay nila anytime na maglayas ka. Handa kang kilayan sa panahong parang hindi mo na kaya. Kapag iniwan ka ng jowa mong pina-ilongan mo; isang katok lang si Barbs at puwede mo na s’yang iyakan.

40% Grace under pressure. Sa buong pelikula, sa mga major major setbacks sa buhay ni Trisha, parang si Barbs ‘yung isa sa may pinaka malaking stress. Mahirap mag-comfort ng kaibigang winasak ng pag-ibig ha. Hindi birong mag-asikaso ng burol sa Pilipinas dahil sa daming technicalities ng mga pamahiin natin. Lalong hindi basta-basta ma-conceal ang pugtong mata ng kaibigan.

Pinakita ni Barbs ang malaking pagpapahalaga nating mga Pinoy sa bilin ng namatay. Ang bilin ng namatay, kung kaya rin lang tuparin, ay parang utos ng hari. Higit sa lahat, kaya siguro kapansin-pansin din ang karakter ni Barbs ay pinatunayan n’ya na ang pagiging BFF ay ‘til death do us part din.

Rating:

Taas Kilay!

#

     Ang Gadingan Awards for Filifictional Characters ay isang pagkilala sa mga natatanging karakter sa mga akdang Filipino na nakasalamuha ko na’t nag-iwan ng kakaibang pitik sa akin bilang mambabasa/manonood, bilang Filipino, at bilang tao.

     Disclaimer: Ang Gadingan Awards ay isang award-giving body. Literal na nag-iisa lang ako sa pagpili ng mga karakter at apelyido ko ‘yung Gadingan. Nag-iisa ako sa gitna ng aking critic circle na binubuo ng mga boardmates kong langgam.

#BuwanngmgaAkdangPinoy