Sakmal-sakmal ng dilim ang paligid
Halumigmig ng hangin na nagpapaalala
Malapit na uling mangasunog ang mga bibingka
Sa pagitan ng pinagsalubungan ng mga ilog
Lilingain kung maaaninag pa ang nag-aabang
Na pulahang salaksak, nakapaghapunan na siguro
Sisitsit ang talahiban,
Matitigilan
Kung saan
Namataan ang ahas tulog nang santing pa
Maalalang tawiran nga pala ng mga bayawak
Kahit limang minuto lang sa pitak na damuhan
Na kinukulong ng labin'dal'wang puno
Nangagsindi ang mga mumunting parol
Madaling-madali sa pag-andap-andap
Nag-aakit ng makakausap
Maitawid lang ang gabi
Baling rikit ng mga kislap
Wari'y masidhi ang paghahanap
Mananalangin
Sana'y mapagbigyan
Ang mga salmong tugunan
#
No comments:
Post a Comment